Autor
Botime të Reja
Rreth Nesh
Kloeja është vajza më e vetmuar në botë. Ndodh të takohet me zotni Qelbashin, endacakun e qytetit. Po, ai vjen ca erë – por është i vetmi njeri që tregohet i mirë me të. Dhe, kur zotni Qelbashit i nevojitet një vend për t’u strehuar, ajo e fsheh te baraka e kopshtit!
Kloeja një vajzë e sjellshme dhe kureshtare, vendos të zbulojë më shumë për të.
Ajo mëson se ka sekrete që të çojnë në fatkeqësi. Dhe, kur flitet për sekrete, për zotni Qelbashin ka shumë më tepër nga ç’kupton hunda...
Një histori plot humor, origjinale dhe prekëse që të fut në mendime. Një rrëfim për mirësinë, paragjykimet, miqësinë dhe sa e rëndësishme është të mos i gjykojmë të tjerët vetëm nga pamja e jashtme.
David Walliams për këtë libër ka bashkëpunuar sërish me Quentin Blake i cili me ilustrimet e tij të mrekullueshme i ka tërhequr fëmijët në lexim.
DAVID WALLIAMS është shkrimtar, aktor dhe komedian. Prej kohësh është një fenomen i letërsisë për fëmijë. Librat e tij janë përkthyer në 55 gjuhë dhe janë shitur në më shumë se pesëdhjetegjashtë milion kopje në mbarë botën. Një nga bashkëpunëtorët më të afërt të tij është ilustruesi Tony Ross, i cili ka ilustruar shumë nga librat e Walliams. Po kështu ai ka bashkëpunuar edhe me piktorin Quentin Blake, të cilin e vlerëson si një nga heronjtë e fëmijërisë së tij.
Librat e Walliams kanë marrë vlerësime të paprecedentë nga kritikët dhe kanë thyer rekorde, duke qëndruar në vendin e parë të letërsisë për fëmijë për 240 javë.
Quentin Blake është një nga ilustruesit më të njohur britanikë të letërsisë për fëmijë. Ai është veçanërisht i famshëm për bashkëpunimin e tij të gjatë me shkrimtarin Roald Dahl, duke u dhënë jetë personazheve të paharrueshme të librave si “Matilda”, “Çarli dhe fabrika e çokollatave” etj. Gjatë karrierës së tij ka ilustruar mbi 500 libra, duke bashkëpunuar me autorë të njohur si Roald Dahl, Michael Rosen, Russell Hoban etj.
Blake ka bashkëpunuar me shkrimtarin David Walliams për dy libra “Djali me fustan” dhe “Zotni Qelbashi”.
Stili i tij artistik është lehtësisht i dallueshëm përmes vizatimeve me penë, ngjyrave dhe personazheve plot humor e gjallëri.
Në vitin 1999 u bë laureati i parë britanik i letërsisë për fëmijë, ndërsa në vitin 2002 mori çmimin ndërkombëtar “Hans Christian Andersen” për ilustrim. Është nderuar gjithashtu me medaljen “Kate Greenaway” dhe shumë çmime të tjera.
Quentin Blake mbetet një figurë frymëzuese e ilustrimit botëror dhe një artist që ka shoqëruar breza të tërë fëmijësh në zbulimin e magjisë së leximit.