Egon Caesar Conte Corti

Egon Caesar Conte Corti (lindi në1886 në Agram, sot Zagreb, vdiq në 1953 në Klagenfurt) vinte nga një derë e vjetër fisnike e Lombardisë. Në fillimet e tij ishte oficer në ushtri, por pas humbjes së Luftës së Parë Botërore në vitin 1918, filloi të shkruante vepra biografike. Ai do i përkushtohej sidomos historisë së shekullit XIX dhe u bë specialist i veprave biografike për personalitetet e aristokracisë së lartë evropiane.

Librat e Cortit nuk përmbajnë vetëm pasazhe të shumta origjinale nga gazetat e kohës, por edhe të dhëna nga burime historike unike: Corti është i vetmi autor që familje të ndryshme fisnike e lejuan - sepse e shihnin si të sërës së tyre- të hulumtonte në arkivat e tyre private, shumë prej të cilave u shkatërruan gjatë Luftës së Dytë Botërore.

Megjithëse Corti ishte thellësisht i orientuar nga monarkia dhe ishte martuar me një grua hebreje, ai ishte anëtar i “Volksbund-it” të themeluar në vitin 1937, që shërbente si organizatë maskimi e NSDAP-së (partia naziste), që asokohe ishte ilegale në Austri.