Napoleon Bonaparti

“Imagjinata udhëheq botën”

Napoleon Bonaparti, figurë universale e gjenialitetit njerëzor, dështoi në themelimin e një dinastie, por përcaktoi politikën moderne. Me qeverinë e tij ai i tregoi botës se një vend mund të jetojë në mënyrë të qëndrueshme edhe nën një tjetër ligj, veç atij të monarkisë absolute dhe privilegjeve të trashëgueshme e kishtare. Në Francë, Kodi ynë Civil dhe shumë nga institucionet tona, që prej krijimit të tyre nga Napoleoni janë reformuar pak ose aspak dhe janë zbatuar e përshtatur në mbarë botën.

Të sjellim fatin e jashtëzakonshëm të atij që Klauzeviç e quante “Zot i luftës”, në dimensionin e jetës së një njeriu të zakonshëm, është sfida e këtij libri. Bonaparti u bind shumë shpejt se fati i tij ishte përcaktuar; kjo biografi na tregon rastësitë e jetës së tij. Pak nga pak, ai u flijua për shtetin francez, derisa sakrifikoi lirinë e përditshmërisë së tij. Duke shkruan romanin e Bonapartit, Paskal Fotrie ia rikthen atij humanizmin.

...Teksa përgatitem të tregoj këtë jetë madhështore, pas kaq shumë autorësh të mëdhenj e të shquar, mendoj pikërisht për këtë betejë të humbur që në fillim – për këtë kurth të dyfishtë: servilizëm apo dialog të shurdhërish, glorifikim i tepërt i pushtetit apo refuzim skeptik për t’i lënë sirenat e besimit të jehojnë, me rrezikun për të mos parë, dëgjuar e kuptuar asgjë. Napoleoni e ka thënë: “Imagjinata udhëheq botën”.

Dhe unë dua ta marr seriozisht profesionin e besimit paradoksal të kësaj politike pragmatike dhe realiste, duke u rikthyer përsëri në burimin e ëndrrave që kanë ushqyer ambicien dhe pasionin e tij politik, pa rënë në grackën që ai na ngre: pretendimin e fatit hyjnor të pushtetit...