Autor
Botime të Reja
Rreth Nesh
Gjeneral De Gol, historia e jashtëzakonshme e liderit të Francës moderne!
I kthyer në legjendë më 18 qershor 1940, kur u bëri thirrje francezëve të mos i nënshtroheshin fatalitetit, Charles de Gaulle (1890–1970) mbetet një nga figurat më të shquara të historisë franceze dhe botërore të shekullit XX. Si udhëheqës i Francës së Lirë gjatë Luftës së Dytë Botërore dhe themelues i Republikës së Pestë, ai luajti një rol vendimtar në çlirimin e vendit dhe në ndërtimin e shtetit modern francez.
Jeta dhe vepra e tij janë të lidhura ngushtë me disa nga momentet më përcaktuese të historisë së Francës: organizimin dhe udhëheqjen e Rezistencës Franceze kundër pushtuesve nazistë dhe bashkëpunëtorëve të tyre, drejtimin e qeverisë së përkohshme pas çlirimit, përballimin e krizës së Republikës së Katërt dhe reformimin e institucioneve shtetërore përmes krijimit të Republikës së Pestë.
Kjo biografi sjell portretin e një udhëheqësi të jashtëzakonshëm, të përkushtuar ndaj pavarësisë, dinjitetit dhe madhështisë së Francës. Përmes rrugëtimit të tij politik e historik, ajo zbulon njeriun pas figurës legjendare dhe trashëgiminë e tij të qëndrueshme në politikën franceze dhe në marrëdhëniet ndërkombëtare.
“Francezë dhe franceze! Gjeneral de Gol ka vdekur. Franca ka mbetur e ve…” - Me këto fjalë, presidenti francez Georges Pompidou njoftoi vdekjen e një burri që mishëroi për dekada aspiratën e vendit të tij për liri, pavarësi dhe madhështi kombëtare.
Éric Roussel është historian, gazetar dhe biograf francez, i njohur për veprat kushtuar figurave më të rëndësishme politike të Francës së shekullit XX. Ai është anëtar i Akademisë së Shkencave Morale dhe Politike të Francës.
Rousseli është doktor i së drejtës dhe ka studiuar letërsi dhe shkenca politike. Karrierën gazetareske e nisi në gazetën Le Monde dhe më pas në Le Figaro littéraire. Krahas gazetarisë, ai iu përkushtua studimit të historisë politike dhe shkrimit të biografive të personaliteteve që kanë ndikuar në zhvillimin e Francës moderne.
Ndër veprat e tij më të njohura janë biografitë e Charles de Gaulle, Georges Pompidou, Jean Monnet, François Mitterrand etj. Librat e tij dallohen për kërkimet e gjera arkivore, shfrytëzimin e dëshmive historike dhe përpjekjen për të paraqitur me objektivitet jetën dhe veprimtarinë e figurave politike. Biografia e tij për Charles de Gaulle, botuar fillimisht më 2002, u vlerësua me çmime letrare dhe historike.
Përmes veprës së tij, Éric Roussel ka dhënë një kontribut të rëndësishëm në studimin e historisë politike franceze, duke ndërthurur dokumentimin historik me analizën e karakterit, ideve dhe vendimeve të udhëheqësve që formësuan Francën bashkëkohore.